الساحر الجحافي
ليت المسافة قريبة بينك وبيني
تنظر بعينك وتعرف فين حطيتك
في وسط قلبي وفي روحي وفي عيني
وسلطنة مملكات الحب وليتك
يا بهجة الروح يامعنى يسليني
وحدك رجوتك ووحدك ذي ترجيتك
وصغت لك الف معنى في دواويني
وفي معارج سماء البوح رقيتك
نحت تمثال حسنك في بساتيني
وابدعت في النحت واغليته واغليتك
وارهقت في رسم لوحاتك تلاويني
ومرسم الفن والابداع سميتك
ووسط نوتات ترنيمي وتلحيني
سكبت روحي نغم باذخ وغنيتك
اتقنت لجلك فنون الكون ياعيني
واخجلت فرسانها من يوم حبيتك
وبعدها من دمي ذي في شراييني
كتبت بيعة سموك حب واهديتك
ارقى واسما مشاعر ساكنة فيني
واصبحت وحدك اذا أشرت لبيتك
لبى… وليتك بلحظة توق تأتيني
وتروي الروح ذي تهمس: تمنيتك
تطاوع الشوق ليلة بس وتجيني
أو تترك الليل يسرقني ألى بيتك
او حيثما ترتضي نفسك تلاقيني
واضبط لك أرقام تاريخك وتوقيتك
أسكب على سفح صدرك خمر تكويني
واسكر بأنفاس ثغرك قول : ياليتك