كتب .. انتصار محمود مقبل
اللي يبيعوا الفول بالحوطة وتبن يشكروك لأنه بعد ماكنا نشتري كيلو والا اثنين كيلو فول وننجحهم ونحطهم بالثلاجة ونشل منه ويجلس معانا اسبوع والا اسبوعين دحين نشتري فول من السوق كل يوم بيومه لأن الكهرباء بح .
محلات البرد وسيارات معمر للثلج يشكروك لأن بيع البرد مش تأثر عندهم ( ونحن في عز الشتاء ) وبضاعتهم رائجة ايام البرد زيها زي ايام الحمى لأن الكهرباء بح .
اصحاب الصيد يشكروك لأنه بدل ماكنا نشتري حق يومين والا حق ثلاث ايام دحين نشتري يومياً لأن الكهرباء بح .
و كلمة شكر لك من اصحاب البوز ، تجارتهم رابحة هذه الايام لأن الكهرباء بح ويعني الماء بح .
وأهم كلمة شكر لك من النامس اللي يقشرنا وشبعان من دمنا كل ليلة من بعد المغرب ولما الفجر ، لاخلى جاهل ولا كبير ولا شيبة ولا عجوز قشر الاوادم كلهم وشبعاااان دم لأن الكهرباء بح . في مثل يقول لو الحياة نكد حسن المرقد . ونحن الحياة نكد والمرقد نكدين .
أما المواطن اللحجي في الحوطة وتبن لايشكرك ابداً ويقول لك يامحافظنا العزيز اتقوا الله فينا . لا كهرباء ولا ماء ولا رواتب والغلاء يذبحنا ذبح .
من بعد المغرب والبطاريات حق الناس تصفر من كل بيت بسبب غيوم السماء وغيوم الكهرباء . ولو هرجنا على الكهرباء المطبلين يقولوا لنا موضوع الكهرباء سيادي . طيب ليه سيادي علينا وعلى عدن مش سيادي . ليه عدن تلصى ساعتين باربع ساعات والا بثلاث ساعات ولحج ساعة وحدة بس لاصي و 23 ساعة طافي وتقريباً كملنا الاسبوع الثالث بهذا الوضع . ليه يعاملونا وكأننا مواطنيين من الدرجة الثانية حتى برواتب المعلمين عدن هي السباقة باستلام العلاوات وراتب شهر 12 بفضل ولاة امورها ونقاباتها المصحصحة ولحج عادها تسعى لعل وعسى يصرفوا رواتبها وبفضل ولاة امورها ونقاباتها الراقدة .
ماء عدن من لحج ولو جربوا يجلسوا زي لحج بدون كهرباء ولا ماء بايعرفوا يعدلوا بينهم بالتساوي و لو مش قادرين تخلوهم يعدلوا جربوا منع الماء وحسسوا المسؤولين حق عدن بمعاناة المواطن اللحجي اللي يشتري كل يومين او ثلاثة ايام بوزة ماء 1000 لتر بخمسة الف ريال . نحن مش ضد اهلنا في عدن ولكن الظلم حرام للحج واهلها والمساواة في الظلم عدل .
ولشباب ورجال الحوطة وتبن شوه نقول لكم زي ماقال التمباكي الرجال ماتوا ومخزنيين قاتو . ماله صحصحوا قليل اعترضوا تحركوا بدل الفسبكة والوتاس والهرج عن بـُعد تحركشوا زي اصحاب عدن واعجنوا ابوها يمكن تتسانى الامور بفضلكم أنتم مادام ولاة امورنا مش يحسوا بمعاناة اهلكم وناسكم .
..انتصار محمود مقبل
مواطنة متضررة من حوطة لحج .